IT IS UNBELIEVABLE !

நம்ப முடியவில்லை !
             
                  &

இளங்காலைக்  காற்றில்

வேப்ப மரத்தடியில்

இனிமையாய்ப்   புரண்டிட

இமை இறக்குகையில் --

எதிர் வீட்டுச் சிறுவன்

பதற்றமுடன் எழுப்புகிறான் --

" ராஜீவ் காந்தி செத்து விட்டார் !

நேத்து ராத்திரி ஸ்ரீ பெரும்பூதூரில்

பத்தரை மணிக்குக் கொலையுண்டார் ! "

நம்பவில்லை--

நம்பத்தான் கூடுமோ ?

சிறுவன் சிதறிய சேதியைச்

சிரிப்பில் எற்றித் தள்ளுகிறேன் --

"யாரிடமடா ஏமாற்று வேலை ?

நூல் சுற்றுகிறாயா ? "

" உண்மை! உண்மை !" என

விழிகள் பதறுகையில்

விழி ஓரங்களில்

உதட்டு அசைவுகளில் 

விஷமங்கள் தேடித் திரிகிறேன்  !

 "தமிழ் நாட்டிலாவது...

அதுவும் திருபெரும்பூதூரிலாவது ...

அதிலும் ராஜீவையாவது.

அதுவும் கூடக்   கொல்வதாவது ? 

பூ சூட்டடா

வேறு பெரும் காது பார்த்து..! "

சிறுவன் திகைக்கிறான் -

சொன்னதையே  சொல்கிறான் ;

அவனுக்கே என் சொல்லால்

அவன்மீதே அவநம்பிக்கை -

நிமிடங்கள் நகர்ந்தபடி

மெல்லப் பேசத் துவங்கினவே --

நம்பிக்கை மலை ஒன்றின்

நாடி தளர்கிறது--

தெருவோடும் மௌன நதிதனில்

சிறுசிறு குமிழ்களாகச்

சேதி வெடிக்கையிலே

நம்பாமல் நம்பத் துவங்கி

சோகச் சுழி சிக்கித் தவிக்கின்றேன் !

உண்மையே ! கொடு  நஞ்சே !
நெஞ்சு விழுங்க முடியலையே.---
இதயம் தாளலையே --
இளைஞன் ஒருவனின்
அழகான சரித்திரத்தை
செங்குருதியில் தோய்த்தாயே--.

எளியோரை ஏற்க நினைத்தானை
தாய்மடியில் துண்டு போட்டாயே---.
தேசத் தாய் காக்கக்
கைகேட்டு வந்தானைச்
சிலைத் தாயும் துடித்திடக்
கூறு போட்டது என்ன நீதி ?

கொலைக் கும்பல் இன்று
சிங்களம் இருந்திறங்கி
புலி வேடமிட்டு வீரர் போர்வையிலே
குருதி வெறி கொண்டு
அலைகின்ற தமிழ்க் காட்டினிலே,

வெண்புறாவே  --

அன்பேந்தி மட்டும் ஏன் வந்தாய் ?

தமிழ்நாடே !
தூய உன் சரிதை இன்று
தீக் காயம் கொண்டதுவே..!
இந்திய வரலாற்றில் இன்று
தலைக் குனிவாய்  ஏன் ஆனாய் ?

தாயே !
எவ்வேளைதனில் நீ ஜனித்தாய் ?
எவ்வேளைகளில் இரு மைந்தரையும்
பெற்றளித்தாய் இந்நாட்டிற்கு ?
மூவருமே இயற்கையாய்
இயற்கை எய்திடாது
முழு உடலை இம்மண்ணில்
சரியாது போனதென்ன ?
தேச நலன் கருதி
 செங்குருதிச் சாரல்களைப்
பூமியில் சொரிந்ததென்ன ?

ஏ ..பாதகியே !
கொடியாளே 1
கல் நெஞ்சினளே !

அன்பு முகம் பார்க்க வந்த     

அனைவரையும்  கொன்றாயே --
என்ன செய்தார் அவர் பாவம் ?

ரத்தவெறி கொண்ட
பேடி நாயே --
எவர் பின்னால் ஏவியவர் ?
எவ்விலைக்கு உனை விற்றாய் ?

துப்பாக்கிக் கொலைஞர்களை
விடுதலை வீரராக்கிப்
புலிக் கோடிட்ட தமிழகமே !
நன்றாகத் தலை குனிவாய் ..!

--சந்திர கலாதர்
     [ மே ,1991 ]