காற்றே மெல்ல வா!

முதுகிலே அன்பாய்த் தட்டு --

பயனற்ற பழுப்பாய்

சுமையான தொடர்பாய்

பிடிப்பிலாப் பிடிப்பாய் 

பசுமைஇடை இகழ்வாய் 

இன்னும் எத்தனை நாள் ?

என் காலம் முடிந்தது

என் தொடர் அறு-

மழைத் துளிபோல்

மண் இறங்கி 

என் மரத்திற்கே 

பொட்டு உரமாகிறேன் !

உள்வலி தாங்கவில்லை

உடனே வாராயோ ?

 

---சந்திர கலாதர்    

புத்தம் புதுக்காலை

புத்தம் புதுச் சேதி

வானம் கொட்டுதே

மழைபோல் நனைக்குதே- .

மைனா ஒன்று தனியாய்

முகடு மீது அமர்ந்து

ஐந்தாறு மெட்டில்

அழகாய் இசைக்குதே

துள்ளச் செய்யுதே -

கீழ்த் திசை வானில்

தென்-வடல் நெடிதாய்

பூத மேகம் படுத்து

கதிரை மூட முட்டுதே -

மேகம் குத்திக் கிழித்து

ஒளிக்குழல் நூறு

வான் சீறிப் பாயுதே!

மேற்கில் மோதிச் சிவக்குதே-

டைடானிக் கப்பல் போலே

சரிபாதி உடைந்து

சந்திரன் சரிந்து கிடக்குதே -

தியானிக்கும் மரங்கள்

மௌனமொழி பேசி

அமைதி நிரப்புதே-

தினம் தினம் காலை

ஏமாந்ததேயில்லை !

----சந்திர கலாதர்